29-апрелде Кыргыз Республикасынын Мамлекеттик өнүктүрүү банкынын акционерлеринин жылдык жалпы чогулушу болуп, анда 2024-жылдын жыйынтыгы чыгарылды.
Жыл ичинде банк туруктуу өсүштү көрсөтүп, таза кирешесин эки эсеге көбөйттү жана туунду компаниялары менен бирге өлкөнүн бюджетине 3,7 млрд сом салык которду.
2024-жылдагы бардык пайда мамлекетке дивиденддерди төлөөгө жумшалат.
Кредиттик портфел 9 эсеге көбөйдү, инвестициялык долбоорлор колдоого алынды, анын аркасында 1000 жаңы жумушчу орун түзүлдү. Каржыланган карыз алуучулардын кирешеси 3,6 млрд сомго көбөйгөн.
Банк “жашыл” каржылоону жигердүү өнүктүрүүдө: Дүйнөлүк банктын 60 миллион доллары чакан жана орто бизнести колдоого багытталат.
Мындан тышкары, эл аралык каржы уюмдары менен 554 миллион долларга жакын 5 келишимге кол коюлган.
Мамлекеттик банктын стратегиялык башкаруусу астында «Альфа Телеком» ЖАК жана «Мамлекеттик лизинг компаниясы» ААК филиалдары ийгиликтүү өнүгүүдө.
Мамлекеттик өнүктүрүү банкы туруктуу экономикалык өсүштү камсыз кылуу жана өлкөнүн артыкчылыктуу секторлорун колдоо боюнча өзүнүн миссиясын аткарууну улантууда.
