Эл аралык S&P Global Ratings рейтинг агенттиги Кыргыз Республикасынын Мамлекеттик өнүктүрүү банкына биринчи жолу узак мөөнөттүү жана кыска мөөнөттүү “B+/B” кредиттик рейтингин берди. Узак мөөнөттүү рейтингдин келечеги – “Туруктуу”.
Эл аралык кредиттик рейтингди алуу SDBнын институционалдык өнүгүүсүндөгү маанилүү этап болуп саналат жана Кыргыз Республикасынын Министрлер Кабинетинин улуттук өнүктүрүү институттарын чыңдоо жана алардын инвестициялык жагымдуулугун жогорулатуу боюнча ырааттуу аракеттерин тастыктайт.
Дайындалган рейтинг эл аралык финансылык уюмдардан, өнүктүрүү банктарынан жана чет элдик институционалдык инвесторлордон ачык-айкын жана атаандаштыкка жөндөмдүү шарттарда узак мөөнөттүү финансылык ресурстарды тартуу үчүн жаңы мүмкүнчүлүктөрдү ачат. Бул Кыргыз Республикасында туруктуу экономикалык өсүшкө багытталган артыкчылыктуу долбоорлорду каржылоону көбөйтүүгө мүмкүндүк берет.
Кыргыз Республикасынын Мамлекеттик өнүктүрүү банкынын башкармалыгынын төрагасы Эмил Такырбашев мындай деп белгиледи:
“S&P Global Ratings компаниясынан рейтинг алуу Мамлекеттик өнүктүрүү банкынын ишенимдүүлүгүн жана туруктуулугун маанилүү таануу болуп саналат. Бул Кыргыз Республикасынын Министрлер Кабинетинин натыйжалуу улуттук өнүктүрүү институтун түзүү боюнча системалуу ишинин натыйжасы. Бул эл аралык рейтинг чет элдик өнөктөштөрдүн ишенимин арттырат жана Банктын энергетика, өнөр жай, транспорт инфраструктурасы, жашыл экономика жана башка артыкчылыктуу тармактардагы стратегиялык маанилүү долбоорлорду ишке ашыруу үчүн узак мөөнөттүү каржылоону тартуу мүмкүнчүлүгүн кеңейтет”.
Рейтинг ошондой эле Банктын ишинин ачык-айкындуулугун жана анын эл аралык корпоративдик башкаруу стандарттарына шайкештигин көрсөтөт. Мамлекеттик өнүктүрүү банкы өнүктүрүү долбоорлорун каржылоо боюнча мамлекеттик саясатты ишке ашырат, өлкөнүн экономикасы үчүн стратегиялык мааниге ээ болгон демилгелер үчүн узак мөөнөттүү капиталга жетүүнү камсыз кылат.
Эл аралык агенттиктен рейтинг алуу – Кыргыз Республикасынын Президенти жана Кыргыз Республикасынын Министрлер Кабинети тарабынан улуттук каржы системасын өнүктүрүү, чет элдик инвестицияларды тартуу жана өлкөнүн туруктуу социалдык-экономикалык өнүгүүсүнө салым кошкон долбоорлорду каржылоо мүмкүнчүлүктөрүн кеңейтүү боюнча коюлган максаттарга жетүүдөгү дагы бир кадам.
Маалымат үчүн:
S&P Global Ratings Moody’s Ratings жана Fitch Ratings менен бирге алдыңкы эл аралык рейтинг агенттиктеринин бири («Чоң үчтүк») болуп саналат. Агенттиктин кредиттик рейтингдери карыз алуучулардын ишенимдүүлүгүн баалоодо жана каржылоо чечимдерин кабыл алууда эл аралык инвесторлор, банктар жана каржы институттары тарабынан кеңири колдонулат.