Кыргыстан Республикасынын Мамлекеттик өнүктүрүү банкы Коңур-Өгүз чакан гидроэлектростанциясынын курулуш долбоорун каржылай баштады. Ачылыш аземи мамлекеттик органдардын, жергиликтүү өз алдынча башкаруу органдарынын өкүлдөрүнүн, аймактын тургундарынын жана долбоордун өнөктөштөрүнүн катышуусунда өттү.
Чакан гидроэлектростанция Жалал-Абад облусундагы Коңур-Өгүз дарыясында курулат. Анын орнотулган кубаттуулугу 3,5 МВт, жылына 15,6 миллион кВт/саат электр энергиясын өндүрөт.
Бул долбоор өлкөнүн электр энергиясын өндүрүү кубаттуулугун жогорулатууга, кайра жаралуучу энергия булактарын өнүктүрүүгө жана аймактын электр менен камсыздоосунун ишенимдүүлүгүн жогорулатууга салым кошот. Электростанциянын курулушу инвестицияларды тартуу, жумуш орундарын түзүү, салык кирешелерин көбөйтүү жана тиешелүү инфраструктураны өнүктүрүү аркылуу аймактын социалдык-экономикалык өнүгүүсүнө да оң таасирин тийгизет.
Долбоор өлкөнүн энергетикалык коопсуздугун чыңдоого багытталган гидроэнергетиканы өнүктүрүү жана кайра жаралуучу энергия булактарын кеңейтүү боюнча мамлекеттик артыкчылыктарга ылайык ишке ашырылууда.
Мамлекеттик өнүктүрүү банкынын башкармалыгынын төрагасы Эмиль Такырбашев мындай деп белгиледи:
“Кайра жаралуучу энергия долбоорлорун каржылоо Мамлекеттик өнүктүрүү банкынын ишмердүүлүгүнүн негизги багыттарынын бири болуп саналат. Чакан гидроэлектростанцияларды курууга колдоо көрсөтүү менен биз жаңы энергетикалык кубаттуулуктарга гана эмес, аймактарды туруктуу өнүктүрүүгө, өлкөнүн инвестициялык жагымдуулугун жогорулатууга жана заманбап энергетикалык инфраструктураны курууга да инвестиция салабыз. Мындай долбоорлорду ишке ашыруу Кыргыз Республикасынын экономикасын арзан, ишенимдүү жана экологиялык жактан таза электр энергиясы менен камсыз кылуу боюнча стратегиялык максатка жетүүгө өбөлгө түзөт”.
Мамлекеттик өнүктүрүү банкы энергетика, өнөр жай, инфраструктура жана экономиканын башка артыкчылыктуу тармактарындагы стратегиялык жактан маанилүү инвестициялык долбоорлорду каржылоону улантып, туруктуу экономикалык өсүштү камсыз кылат, өлкөнүн атаандаштыкка жөндөмдүүлүгүн жогорулатат жана калктын жашоо сапатын жакшыртат.