2025-жылдын 21-апрелинде Вашингтондо Дүйнөлүк банк менен Кыргызстандын Каржы министрлигинин ортосунда 120 миллион АКШ доллары өлчөмүндө жеңилдетилген пайызсыз насыя берүү боюнча келишимге кол коюлган. Макулдашууга ылайык, Кыргыз Республикасынын Мамлекеттик өнүктүрүү банкына “Микро, кичи жана орто ишканалар үчүн туруктуу каржы рынокторун өнүктүрүү” долбоорун каржылоо үчүн 60 миллион доллар берилет.
Долбоордун максаты – чакан жана орто бизнес үчүн жеткиликтүү “жашыл” кредиттер. Эми чакан бизнес «жашыл» долбоорлорго рыноктук баада арзаныраак насыя ала алат.
Чакан жана орто ишканалардын туруктуу иштеши Кыргызстандын экономикасынын өсүшүнө шарт түзөт. Ошондой эле жумуш орундарын түзүшөт, калктын жыргалчылыгын жана экологиялык абалын жакшыртышат. Климаттын өзгөрүшүнүн шартында мындай ишканаларды “жашыл” технологияларга өтүүдө колдоо өлкө үчүн маанилүү артыкчылыкка айланууда.
Жалпысынан Кыргыз Республикасынын Мамлекеттик өнүктүрүү банкынын микро, чакан жана орто ишканалар үчүн “жашыл” демилгелерине арзан кредиттери туруктуу каржылоо рыногун өнүктүрүүгө, бизнестин туруктуулугун жогорулатууга, экологиялык абалды жакшыртууга жана өлкөнүн экономикасына оң таасирин тийгизет.
Мамлекеттик өнүктүрүү банкы бизнести, туруктуу өсүштү жана инновацияларды колдоону, Кыргызстандын экономикасын өнүктүрүүдө жана глобалдык туруктуу өнүгүү максаттарына жетишүүдө анын ролун күчөтүүнү улантууда.