Кыргыз Республикасынын Мамлекеттик өнүктүрүү банкы жана «Мега Трафик Групп» ЖЧКсы Баткен облусунун Кадамжай районунда заманбап кирпич заводун куруу боюнча инвестициялык долбоорду каржылоо боюнча келишимге кол коюшту.
Келишимге ылайык, Мамлекеттик өнүктүрүү банкы күнүнө 300 000 кирпичке чейинки долбоордук кубаттуулуктагы катуу керамикалык кирпич өндүрүүчү жайдын курулушун каржылайт. Жаңы завод Баткен облусун, Кыргыз Республикасынын түштүк аймактарын жана чек ара базарларын курулуш материалдары менен камсыз кылат.
Бул долбоор аймактын социалдык-экономикалык өнүгүүсү үчүн абдан маанилүү. Аны ишке ашыруу жаңы жумуш орундарын түзөт, өнөр жай өндүрүшүн көбөйтөт, Баткен облусунун өндүрүш потенциалын бекемдейт жана курулуш тармагын жогорку сапаттагы жергиликтүү өндүрүш товарлары менен камсыз кылат. Заманбап автоматташтырылган технологияларды жана өзүбүздүн чийки затыбызды колдонуу өндүрүштүн натыйжалуулугун жогорулатат жана логистикалык чыгымдарды азайтат.
Кыргыз Республикасынын Мамлекеттик өнүктүрүү банкынын башкармалыгынын төрагасы Эмил Такырбашев мындай деп белгиледи:
“Бул долбоорду каржылоо биздин өнүктүрүү институту катары миссиябызга шайкеш келет. Биз жаңы өндүрүштөрдү, жумуш орундарын түзүүчү жана өлкөнүн аймактары үчүн узак мөөнөттүү экономикалык пайда алып келүүчү долбоорлорду колдойбуз. Жаңы кирпич заводу Баткен облусундагы маанилүү өнөр жай объектисине айланат, ата мекендик курулуш материалдарын өндүрүүнү көбөйтөт жана Кыргыз Республикасынын экономикалык өнүгүүсүнө салым кошот”.
Бул долбоор Кыргыз Республикасынын Мамлекеттик өнүктүрүү банкынын өлкөнүн аймактарында өнөр жайды өнүктүрүүгө, импортту алмаштырууга жана туруктуу социалдык-экономикалык өнүгүүгө багытталган инвестициялык долбоорлорду каржылоого багытталган стратегиялык багытынын алкагында колдоого алынат.
