2025-жылдын 12-майынан 15-майына чейин Кыргыз Республикасынын Мамлекеттик өнүктүрүү банкы (Банк) Азия инфраструктуралык инвестициялык банкынын (АИИБ) миссиясын расмий сапар менен кабыл алды. Иш сапар Эл аралык өнүктүрүү ассоциациясынын «Микро, чакан жана орто ишканалар үчүн туруктуу каржы рынокторун өнүктүрүү» долбооруна (долбоор) АИИБнын потенциалдуу катышуусун талкуулоого арналды, анын алкагында Кыргыз Республикасына 120 млн АКШ доллары бөлүнгөн. Долбоор чакан жана орто ишканалардын финансылык ресурстарга жеткиликтүүлүгүн кеңейтүүгө жана туруктуу жашыл финансылык чечимдерди илгерилетүүгө багытталган.
Сүйлөшүүлөрдүн жүрүшүндө тараптар АИИБнын долбоорго катышуусунун форматтарын, анын ичинде биргелешип каржылоо механизмдерин, колдоонун артыкчылыктуу багыттарын жана өз ара аракеттенүү шарттарын кеңири талкуулашты. Туруктуу өнүктүрүү жана жашыл каржылоо жана улуттук финансы-кредиттик уюмдардын потенциалын жогорулатуу маселелерине өзгөчө көңүл бурулду. АИИБ 50 миллион АКШ доллары өлчөмүндөгү долбоорду биргелешип каржылоосу күтүлүүдө.
Банк экономиканын негизги секторлоруна эл аралык каржылоону тартуу боюнча өзүнүн миссиясына берилгендигин ырастады жана жумушчу орундарын түзүү, ишкердик жигердүүлүктү жана туруктуу өсүштү жогорулатуу үчүн чакан жана орто бизнести колдоонун стратегиялык маанисин баса белгиледи.
Визиттин жүрүшүндө ошондой эле Банк менен АИИБнын ортосундагы инфраструктура жана туруктуу каржылоо жаатында узак мөөнөттүү өнөктөштүктүн келечеги талкууланды. Эки тарап тең кызматташууну өнүктүрүүгө жана Кыргыз Республикасынын экономикалык келечеги үчүн маанилүү болгон биргелешкен демилгелерди ишке ашырууга кызыкдар экенин билдиришти.
Тараптар талкууланып жаткан долбоорлордун алкагында өнөктөштүк мамилелерди мындан ары өнүктүрүүгө жана конкреттүү натыйжаларга жетишүүгө өз ара кызыкдар экендиктерин билдиришти. AIIB миссиясынын иш сапары өлкөнүн туруктуу өнүгүүсү үчүн кызматташтыкты чыңдоо жана натыйжалуу өнөктөштүктү өнүктүрүү боюнча маанилүү кадам болду.